Home » » Minangkabau, Babeda Jauah Jo Kabau Minang

Minangkabau, Babeda Jauah Jo Kabau Minang



Dimulailah carito ko katiko ambo sadang makan lamak jo gulai tunjang di Pasar Raya Padang, di tapi labuah nan gadang. Ambo makan indak surang, tapi lai jo kawan-kawan nan samo manuntuik ilimu di koto nan angek ko. Di kampuang ambo di Marapak iyo ndak tadapeki angek sarupo iko. Tapi baa lai, dek karano ilimu mangko ambo tapaso tahan jo udaro angek mangureh paluah ko.

Sadang lamak-lamak makan, dikacalah kuduak ambo di kawan ambo nan dari Batusangka, Farid namonyo. Nan si Farid ko yo lah tau urang sabalik kalau inyo urang nan
paham adaik, santiang lo panitahan. Indak salah kalau umua sagiko mudo, gala datuak lah lakek di pungguangnyo.

“San, usah mancapak jo makan San. Tutuik muluik tu katiko makan, supayo ndak babunyi. Ciek lai supayo nasi jo aia liua ndak kalua-kalua dari muluik katiko mangunyah,” babisiak lah si Farid ko ka talingo ambo, sabana lambuik, ambo surang nan mandanga.

Ai mandeh yo, ambo tau nan dikecekan Farid ko batua, tapi nan namono tabiaik anak mudo ko pantang diparingekan, pantang tasingguang. Ambo tau ambo iyo salah, tapi iyo kadang kalo raso uju jo sombong ko tibo di ati nan kumuah nan ko. Ambo tambah karehan capak makan ambo, mangunyah mancapak sambia mancaliak buruak mambulalang ka si Farid tadi. A iyo angek Padang ko mambuek kapalo murah samak, panaiak darah wak jadinyo.

***

Dunsanak tau lah baa pergaulan anak Minang nan manuntuik ilimu di siko, banyak nan jauah dari agamo, banyak nan jauah dari taratik. Antah dek lah maraso bebas dek jauah dari urang gaek, antah kok memang lah taraja lia sajak dari kampuang. Nan jaleh barapo urang yo sabana ndak sanang jo kalakuan anak mudo jaman kini. Dunsanak mananyo ambo? Dulu ambo biaso se nyo mancaliak dek ambo sato lo, tapi kini yo pantang bana ambo mancaliak anak mudo nan baparangai bantuak urang nan ndak tantu adaik tu.

Ha iyo wak tinggaanlah masalah akhlak jo kalakuan anak mudo nan jauah dari agamo tadi, kini wak baraliah ka masalah takikihno bahaso Minang di koto nan angek ko. Ambo mangecek takikih di siko, ndak barati takikih disiko se doh, tapi ampia di sado tanah di Ranah Minang ko lah ndak bara nan paduli ka bahaso Minang. Tamasuak ambo. Sainggo bahaso nan ambo pakai saari-ari banyak galaiknyo. Kok sadang paniang, yo ambo buek-buek se istilah Minang baru.

Menelan dalam bahaso Indonesia ambo tuka jadi manalan, padohal ado bahaso minangno, mandaguik, atau malulua jadi jo. Contoh lain, ambo kecekan ambo sadang makan goreng pisang samo katan, padohal nan batua tu makan goreng pisang jo katan. Ah, iyo iko pangaruah tipi ko mah. Ambo jadian bahaso nan dipakai gadih-gadih babaju kurang bahan di sinetron manjadi acuan ambo dalam bahaso Minang. Kini-kini ko baru ambo sadar, kalau bahaso Indonesia tu bukan acuan Bahaso Minang, tapi bahaso Minang ko nan manjadi acuan bahaso Indonesia. Iyo santiang urang Minang dahulu, sarupo Marah Rusli, Aa Navis, Buya Hamka. Santiang sangaik!

Ai katiko ambo sadang asik bacarito jo si Farid nan ka patang, acok lah si Farid ko mamelokan sado kato-kato ambo nan ndak sasuai jo bahaso Minang nan batua. Kan cako lah ambo kecekan ka dunsanak, bahaso anak mudo kini ndak bahaso Minang do, tapi bahaso Jakarta nan diubah-ubah saketek manjadi bahaso Minang.

Ah, kanai tembak lo ambo sakali lai, dek urang nan samo. Antah dek si Farid ko surang nan ingin sagalonyo samparono, atau memang sado urang Batusangka sangaik mamparatian bahaso ko? Ambo ndak tau lo doh, nan jaleh a nan dipelokan Farid kini ko iyo batua, tapi nan namonyo ambo anak mudo, yo ambo kecekan lah ka si Farid ko,

“Bahaso ko nan jaleh paham samo paham Rid. Bialah ambo makai bahaso ambo ko,”

Ai, galak si farid ko, tapi ndak takekeh do, galak yo sekedar galak. Nampak giginyo saketek.

“San, kalau bahaso ko sekedar paham ndak paham, itu samo wak jo kabau tu San. Kabau tu makai bahaso lacuik, kabau tu paham. Tapi awak ko kan urang, nan punyo adaik, punyo budayo, bahaso ko ndak sekedar paham ndak paham, tapi labiah ka panunjuak sia awak, urang ma awak. Alah pernah San mambaco surek Al-Hujurat ayat 13? Di sinan kan Tuan Allah manjalehan kalau awak ko diciptaan di Tuan Allah basuku-suku. A panando suku wak tu? Iyo bahaso wak San, bahaso Minang,”

Panjang leba si Farid ko bacarito, mambaok-baok surek dalam Quran lo lai. Iyo ndak do palawan a nan disampaian si Farid ko doh. Batua jo bana sadonyo. Tapi baa lai, nan namonyo ambo ko anak mudo nan acok taparangkok uju jo sombong. Ambo tinggaanlah si Farid ko surang. Ndak lamak ati ambo ka malanjuikan carito jo inyo lai.

***

A nan disampaian si Farid patang ko takana-kana kini, katiko ambo sadang makan bajamba jo mamak-mamak ambo di kampuang. Makan yo sabana barasiah, tangan ndak mangaca muluik, indak mancapak. Sabanta ko kuduak ambo dikaca lo di Mak Dang ambo, “Jan mancapak jo makan lai, San,”

Eh, takajuik gadang ambo. A nan disabuik Mak Dang ambo ko iyo sarupo jo a nan disabuik si Farid. Kirono iyo ambo nan salamo ko ndak mamparatian aturang-aturang adaik. Ambo kaduduakan sadonyo. Ambo atakan di bawah ikua.

Di jalan ka pulang dari makan-makan, nampak di ambo kabau sadang talamak makan rumpuik. Ai, iyo kareh bunyi daruaknyo. Ditambah lo bunyi capaknyo kareh. Takana lah di ambo kalau ambo salamo ko makan mancapak, sainggo diinggekan de si Farid, de Mak Dang ambo gai. Kini iyo sadar ambo, kalau nan namonyo urang makan t yo ndak buliah samo jo kabau doh. Nan namomyo urang muluikno babeda jo muluik kabau. Nan namonyo urang bisa mangunyah sambia manutuik muluik, nan namonyo kabau yo ndak bisa doh.

Ah, dapek lah di ambo duo ilimu dari si Farid ko. Nan partamo ijan makan mancapak, nan ka duo paliaro bahaso Minang nan manunjuakan kalau awak ko urang Minang. Jan pakai bahaso sinetron nan dibuek sarupo bahaso Minang. Rusak a nan ditinggaan urang-urang tuo wak dulu jadinyo.

Itulah mangkonyo ambo tulih iko supayo manfaat dari si Farid indak baranti sampai ka ambo se, tapi 
dunsanak sadonyo bisa lo maambiak manfaatnyo. Supayo urang Minang sabana jadi urang Minang, ndak jadi Kabau doh, ilang Minangnyo.

Ciek lai, jan diulang kasalahan ambo. Ambo dulu indak maacuahan kecek si Farid walaupun nan dikecekannyo tu batua, dek karano sombong, uju, takabua. Jan sakali-kali dunsanak paliaro takabua ko di dalam dado, dek karano gejala takabua nan utamo ko ado duo. Nan partamo manulak kabanaran, nan kaduo mamandang randah urang lain. Dunsanak kan tau, ibilih kalua dari sarugo dek takabua ko lah.

Lah abih lo lah carito ambo jo si Farid sampai di siko, kok ado salah sabuik, salah kato, ambo mohon maaf ka dunsanak sadonyo.

Untuang-untuang Tuan Allah taruih manuntun awak basamo supayo jadi labiah elok.. ^_^

1 komentar:

  1. Baru sakali ko ambo mambaco, kalau ado dalam bahasa minang Tuan Allah.
    Tuhan, yo Tuhan. Bukan Tuan. Tuan jo Tuhan tu sabana sangaik jauah bedanyo.

    *sekedar koreksi.

    BalasHapus

Mengenai Saya

Foto saya

Hanya seorang kawan, yang ingin menjadi lebih baik, dan berbagi manfaat :)
 
Support : Facebook | Twitter | Google+
Copyright © 2013. Al-Fatih Revolution Brotherhood - Tolong sertakan sumber saat mengutip :)
Template Created by Creating Website Published by Mas Template
Proudly powered by Blogger