Samba Minang Made by Jao

Ado carito ciek lah,

Banyak urang awak nan di rantau taragak jo samba nan di kampuang,

Ado nan taragak jo dendeng, goreng baluik, tambunsu, gulai tunjang, tanak ijau, pokokno samba asli nan sari tadapeki di rantau,

A banyak jo duh nan dibaeno masak surang, dek ndak do urang nan manjua,

Tapi ado nan lawak,

Nan urang-urang ko masak mancaliak resep jo bumbuno dari internet,

Labiah amuah lo mancaliak di internet dari pado batanyo ka amaino di kampuang,

A nan labiah lawak?

Kirono website tampek resep samba urang awak ko urang jao nan mambuek, ndak urang awak doh,

A disikolah tajadi a nan disabuik urang "tahrif", ado lo nan manyabuik distorsi,

Ma nan labiah paham urang jao pado urang awak urusan masak?

Gara-gara nan bantuak ikolah, ado kawan-kawan nan mambuek randang saparo masak, ndak jadi kalio doh, tapi jadi gulai cancang,

Ado lo nan mambuek gulai ikan, anyiano taraso badaso,

Kalau ambo labih suko batanyo ka urang gaek katiko ado bumbu nan ambo lupo,

Daripado ka internet, antah sia nan mambuek, wak ndak tau,

Karano samba urang awak ko ndak sakadar lamak, tapi harus sasuai, asli jo a nan lah diwarihan di enek-biyai wak daulu,

Karano itu lo lah nan ka wak warihan ka anak kamanakan wak kudian,

Gulai nan batumih bumbuno di awal tu gulai cancang noh, salabiahno langsuang dikacau jo santan,

Dari ma wak tau beda-beda nan cando iko?

Ndak dari internet doh, tapi dari urang tuo,

Iyolah, itu lah sukiro-kiro,

Nan jaleh, a jo lah nan ingin wak parajai, jan asal ambiak dari internet,

Karano resep masak wak tu sabanano punyo "sanad", punyo "riwayat",

Ha jagolah iko, panando awak iyo sabana urang Ranah Bundo,

Untuang-untuang awak taruih dituntun Tuan Allah untuak jadi labiah elok.. ^_^